Падтрымаць насКронікаСувязь з намі55+ News
Крыніца фотаздымка: YouTube

27 лістапада прадстаўніца «Універсітэта Залатога Веку» прыняла ўдзел у вэбінары “Сельскія і аддаленыя мясцовасці, прыязныя да сталых людзей”.

На вэбінары Вэрэна Менек (на фотаздымку), экспертка з Універсітэту Манітобы (Канада), дала адказ на два пытанні: што азначае прыязнасць да сталых людзей у кантэксце сельскіх і аддаленых супольнасцяў, а таксама якія фактары дапамагаюць або перашкаджаюць сельскім і аддаленым супольнасцям у станаўленні больш прыязнымі да сталых людзей.

Экспертка адзначыла агульны рост урбанізацыі ў свеце, у тым ліку і ў Канадзе (усяго 19% не-гарадоў у краіне на сённяшні дзень). Але яна таксама падкрэсліла, чаму тым не менш мы павінны клапаціцца пра вёскі і аддаленыя населеныя пункты:

  • Многія сталыя людзі жывуць у сельскай мясцовасці ( 42% сталых людзей ва ўзросце 60+ па ўсім свеце)
  • Сталыя людзі павінны мець магчымасць сталець дома ў сваёй супольнасці
  • Сталыя людзі робяць унёсак ва ўстойлівасць сельскіх і аддаленых супольнасцяў
  • Гарадам патрэбная сельская мясцовасць і наадварот

Спадарыня Менек распавяла, што ў 2007 годзе канадскі ўрад выпусціў дапаможнік для сельскіх і аддаленых супольнасцяў, якія хочуць стаць прыязнымі да сталых людзей.

У ім адзначаныя тыя самыя 8 асноўных рысаў, што і ў дапаможніку СААЗ для гарадоў, прыязных да сталых людзей.

На думку эксперткі, існуюць своесаблівыя выклікі менавіта для сельскіх і аддаленых супольнасцяў:

  • Недастатковая інфраструктура
  • Геаграфічная аддаленасць
  • Абмежаваны доступ да паслугаў
  • Недастатак спецыяльнай экспертызы і лідарскіх навыкаў
  • Маленькія бюджэты
  • Складанасці ў прыцягненні рэсурсаў
  • Канфлікты (“палітыка малых гарадоў”)
  • Адсутнасць палітычнай волі

У той жа час, існуюць і  моцныя бакі і магчымасці для сельскіх і аддаленых супольнасцяў:

  • Моцныя сацыяльныя сувязі
  • Моцнае адчуванне прыналежнасці да месца
  • Мясцовыя лідары больш даступныя
  • Прасцей заахвоціць мясцовых жыхароў
  • Самастойнасць (падыход  “Зрабі сам”)
  • Ужо існуючыя партнэрствы і супраца
  • Магчымасці да эканамічнага развіцця

Больш пра змест вэбінара можна даведацца з прэзентацыі (па-ангельску):

Сельскія і аддаленыя супольнасці, прыязныя да сталых людзей. Верэна Менек, Універсітэт Манітобы.

Вэбінар быў зарганізаваны Міжнароднай федэрацыяй па сталенні (IFA) у рамках серыі сустрэч, прысвечаных Гарадам і супольнасцям, прыязным да сталых людзей. На папярэдніх вэбінарах прадстаўніца Сусветнай арганізацыі аховы здароўя (WHO) распавяла пра актуальны стан і планы на будучыню Глабальнай сеткі такіх гарадоў і супольнасцяў, затым японская экспертка патлумачыла асноўныя індыкатары прыязнасці да сталых людзей, брытанскія калегі распавялі пра гарады і супольнасці, прыязня да людзей, што жывуць з дэменцыяй (Dementia-friendly cities and communities),  а амерыканскі эксперт – як палепшыць жыццё сталых людзей праз інавацыі. Сачыце за навінамі і запісвайцеся на вэбінар (па-ангельску) на сайце Міжнароднай федэрацыі па сталенні.