Падтрымаць насКронікаСувязь з намі55+ News

Творы вялікага Паэта на розных мовах, вершы і песні ў яго гонар, цікавыя госці, яркая вядоўца і цёплая атмасфера – усё гэта пра творчую сустрэчу, арганізаваную 20 красавіка ва УЗВ кіраўніцай курса “Літаратурная Гарадзеншчына ў постацях і лёсах. Пад зоркай Багдановіча” Алай Петрушкевіч.

Сёлета спаўняецца 100 гадоў з дня смерці Максіма Багдановіча і вельмі сімбалічна, што першая і заключная агульныя лекцыі ў восьмым акадэмічным годзе “Універсітэту Залатога Веку” былі прысвечаныя менавіта гэтай славутай постаці.

Арганізатарка імпрэзы – вядомая гарадзенская літаратарка і выкладчыца, кіраўніца курса “Гарадзеншчына літаратурная” Ала Петрушкевіч за кароткі час змагла падрыхтаваць сапраўдны спектакль. Яго ўпрыгожваннем сталі не толькі такія добра вядомыя ў горадзе асобы, як прафесар Аляксей Пяткевіч і паэт Анатоль Брусевіч, але і цэлы шэраг іншых цікавых творцаў.

Адна з іх – Вольга Калмакова, скарыла залю сваімі спевамі. Яна выканала песні на вершы Максіма Багдановіча “Цемень” і “Падыму ўгару сваё вока”, якія напісала менавіта для вечарыны.

Кранулі словы прафесара Аляксея Пяткевіча пра Паэта.

Гарадзенская паэты Анатоль Брусевіч, Ганна Крофта і Ала Нікіпорчык прачыталі свае кранальныя вершы, прысвечаныя Максіму Багдановічу.

Амаль да слёз расчулілі ўдзельнікаў імпрэзы дзяўчаткі-студэнткі Вікторыя Смолка і Аліна Паўлоўская, якія чыталі свае вершы, прысвечаныя Паэту.

Добра падрыхтаваліся да імпрэзы і студэнты УЗВ.

Хор “УЗВышша” выканаў славутую “Зорку Венеру”. Гэты ж твор на польскай (Беата Барась), французскай (Зінаіда Цупрыновіч), нямецкай (Уладзімір Рунге), латышскай (Беата Барась), рускай (Ларыса Кіркевіч) і літоўскай (Вольга Галецка) мовах чыталі слухачы і выкладчыкі УЗВ.

Цупрыновіч Зінаіда, Беата Барась і Уладзімір Рунге
Беата Барась, Вольга Галецка і Ларыса Кіркевіч

“Зорка Венера” на ангельскай мове была выканана Святланай Маразевіч і Анастасіяй Дуброўскай.

Ала Матыс, студэнтка УЗВ, вельмі моцна прачытала вершы Багдановіча “Народ, беларускі народ” і “Учора шчасце толькі глянула нясмела”.

Святлана Елісеева, паэтка, слухачка УЗВ, прачытала свой верш, прысвечаны Максіму Адамавічу.

Ну а студэнтка Надзея Дзянісевіч скарыла ўсіх сваімі “Зоркай Венерай” па-украінску, а таксама ўкраінскай народнай песняй.

Упрыгожваннем сустрэчы стаў паэтычны дуэт Алы Петрушкевіч і Аляксея Пяткевіча, якія прачыталі “Скандынаўскую песню”.

На здымку ўверсе: спявае хор “УЗВышша”

Фота: Радыё Рацыя

Яшчэ запісы

Каментароў - 1

  1. Нина у 12:02

    Агульная лекцыя, прысвечаная памяці Максіма Багдановіча, аставіла след у душы кожнага наведвальніка гэтага мерапрыемства. Прайшла так пазнавальна і сардэчна! Якая радасць за нашага знакамітага паэта, вершы і песні якога аднолькава прыгожа гучаць на розных мовах свету.

Пакінуць адказ

Ваш адрас электроннай пошты не будзе апублікаваны. Неабходныя палі пазначаны як *