Светлай памяці Яўгена Петрашэвіча

Светлай памяці Яўгена Петрашэвіча

Вялікі Чалавек і славуты гарадзенскі кампазітар Яўген Петрашэвіч пайшоў у лепшы свет 11 сакавіка. Пасля сябе ён пакінуў мноства вучняў, кніг і музычных твораў, якія выконваюць зараз розныя калектывы, у ліку якіх і наш хор «УЗВышша». Яўген Петрашэвіч з’яўляўся Пачэсным студэнтам «Універсітэту Залатога Веку», аўтарам гімна УЗВ.

Яўген Петрашэвіч далучыўся да «Універсітэту Залатога Веку» амаль з самага пачатку яго дзейнасці.

Яўген Петрашэвіч, Кастусь Жыць і Сафія Вераб’ёва-Дольская на занятках УЗВ, 2010 год.

Пакуль былі сілы — наведваў заняткі і некаторыя агульныя сустрэчы.

Яўген Петрашэвіч і Святлана Маразевіч на адной з інтэграцыйных сустрэч «Універсітэту Залатога Веку»

Аднойчы ў час адной з інтэграцыйных сустрэч спадар Яўген сказаў, што збіраецца напісаць гімн УЗВ і стрымаў сваё слова.

Словы гімна «Універсітэту Залатога Веку», напісанага Яўгенам Петрашэвічам

Такі аўтограф Яўген Петрашэвіч пакінуў да гімна УЗВ

Кампазітар выконвае гімн УЗВ у сваёй кватэры

Апошняя наша агульная сустрэча з Яўгенам Петрашэвічам адбылася на ўрачыстым закрыцці сёмага навучальнага года УЗВ.

Кампазітар ужо адчуваў сябе не вельмі добра, але прыйшоў павіншаваць нашых студэнтаў і ўсю каманду УЗВ.

Яўген Петрашэвіч і дырэктарка УЗВ Лана Руднік на ўрачыстым закрыцці сёмага навучальнага года праграмы

Мы, арганізатары, студэнты і выкладчыкі «Універсітэту Залатога Веку» таксама заўсёды будзем помніць Яўгена Петрашэвіча. Вечны супакой яго Душы.

Выказваем таксама шчырыя спачуванні розным і блізкім Яўгена Петрашэвіча.

Глядзіце таксама інтэрв’ю з Яўгенам Петрашэвічам, зробленае ў межах праекта «Постаці«.

Успаміны кампазітара пра яго жыццёвы шлях надрукаваныя ў нашым «Жыццёвым дзённіку«.

Яўген Канстанцінавіч Петрашэвіч. Нарадзіўся 8 чэрвеня 1930 г. ў вёсцы Падбараны Мастоўскага раёна Гродзенскай вобласці. У 1939 г. сям’я Петрашэвічаў пераехала ў Гродна. У 1949 г. скончыў 9 клас школы № 8, адначасова вучыўся ў Гродзенскай музычнай школе па класе баяна. У пачатку 50-х вучыўся ў Мінскай музычнай вучэльні па спецыяльнасці баян і дырыжыраванне.

1956-1970 гг.– працаваў у Гродзенскай музычнай школе № 1 імя Ю.Семянякі. Адначасова кіраваў аркестравай групай народнага ансамбля  песні і танца “Нёман” (каля 5 гадоў), потым – аркестравай групай народнага ансамбля танца “Вянок”, таксама 5 гадоў. У 1972-1974 гг. – кіраўнік хору Абласнога савета прафсаюзаў у Гродне. З 1975 г. кіраваў аркестрам народных інструментаў абласнога Палаца піянераў і школьнікаў. Заснавальнік легендарных гарадзенскіх “Дударыкаў”.

Памёр 11 сакавіка 2017 г. у Гродне.

Пакінуць каментар

Ваш эмэйл не будзе паказаны.